aaa253dae8b38ac4965b2bd20143339e.jpg
2f971821bfbe197b81d9497eef5aa659.jpg
9e739fd928c1ef1096635bb4b013b509.jpg
0b36168f28219653977ef7f6dd33b2e7.jpg
Turistička zajednica Grada Bakra
English Ente turistico della citta di Bakar - Citta di Bakar Tourismusverband Der Stadt Bakar - German

ML2020 1170x250

Baštinska škrinjica: Praputnjarski zapisi Jadranke Ajvaz

Baštinska škrinjica: Praputnjarski zapisi Jadranke Ajvaz

(0 glasova)
Napisao/la 
Objavljeno: 14.04.2020.

Va oven delu svoga življenja i ja v ruke držin žmulj, ma ov put je prazan! Va njen ni bevanda, ni šampanj!

Kod i mnogi od Vas, i ja san prestrašena, tužna i zgubljena! Ma, rabi se refat! Z ovoga kantunića moga svita, rad bi se svamin vrnut va "pasano vrime "! Rad se domišljan našeh stareh, ne smemo pozabit da smo i mi njihov sinjal, njihov del! Doklen god domišljanje na njih dura i mi ćemo bit bogateji! Tako ja vidin čuvanje tradicijske baštine. Morda j' moje gljedanje malo "romantično obrnjeno"! Neka je! Ja jušto tako umen!

Va ovo teško vrime, va misli mi se opet vrnjivaju materi naše pokojne.... Svojen življenjen su i nas zadužile, rabi povedat o njimin! Nisu to leh Mima i Kata na počivalu, nisu to "nevoljnice drage" i "svete mučenice", kako su ih z puno ljubavi opisali njihovi sini va čakavskeh pjesmah! To su jake, korajne primorske ženi, čvrste...

"Kai oreh pred kućun,
Zemlja z ke nan trsi rastu
Saki kamičić ima mesto va mane
Saki cvetić ki je ovoga prolića procval
Mene je svoj dih dal"
Branka Vidas Golubica

To su primorske ženi, one tugu, ni žalost nisu povedale, ni onput kad su se pu sv.Josipa spovedale. A življenje ih ni šparalo. Z oveh škrteh kraji već put je rabilo za srićun va tuji kraji proć.
Muži i sini su prošli va tuji svit, a one ustaju doma. Čuvaju čast i kuću, drobnu decu goje, šterni ziju....ne tuže se ni na svit, ni na življenje. Dan njin je bil prekratak, a noć preduga. One delaju, čekaju strpljene kod zemlja, dobre ka i kruh. Trsi režu i vežu, bremena nose! Tanka njin je landica beloga kruha! Muži po tujen svitu, po tujeh brodeh vredno delaju, šparaju soldi i šalju doma! Za decu školat, za kuću, šternu i grunt.
Ni bilo lazno, ni brigu brigovat!

Va to vrime va Praputnjaku je bilo 45 ha vinograda, 40 vagoni grozja, 300 krav i oko 600 ovac.
Praputnjarci su vredni ljudi. Poznati i po vinogradarstvu, podrumarstvu i po" vodice". Primorska žena, Praputnjarka proizvodi "Bakarsku vodicu. Praputnjarske konobi su del naše starine, ke nan povedaju o snalažljivosti, trudu, volji za življenje!
Vavek je bilo od kad je svita i vika i grdoga i lipoga življenja!
Leh, ne sme se skončat, ufat se mora i molit!
I rabi reć da su naše materi življenje nosile i znosile kako su najbolje znale i umele!

Sad je nas moderneh bol i nevolja pritsnula!
Na namin je red, da ov del življenja na svojeh pleći nosimo!
Ne dajmo se zdolun, čvrste budimo kot ov suri kamik na suncu spečen.
Aš, se pasiva i semu će kraj!

Natočimo va svoje čaši za sad bevandu, a doć će vrime i za šampanj!!!

Praputnjak, 11.04.2020.            
Ajvaz Jadranka

"Žmulj vina" s fotografije pjesma je Branke Vidas Golubice.

Poslijednja izmjena dana Srijeda, 15 Travanj 2020 20:15
Više u ovoj kategoriji: Andrea Bauk: Vratit će se tune »